16
Feb

Ku wa 12 Gashyantare 2026, Ubuyobozi bwa Sosiyete y’u Rwanda Ishinzwe Ingufu (REG)  bwakiriye itsinda ry’abayobozi baturutse mu Kigo  cy’ingufu z’amashanyarazi  cya Togo, CEET (Compagnie d’Energie Électrique du Togo), mu ruzinduko rw’akazi rugamije gushimangira ubufatanye hagati y’ibigo byombi no guteza imbere imikoranire.

Ibiganiro byibanze ku gusangira ubumenyi no kurebera hamwe uburyo bugezweho mu kwagura no guteza imbere imiyoboro y’amashanyarazi no kugeza umuriro ku bakiriya hifashishijwe ikoranabuhanga.

Ubuyobozi bwa REG n’intumwa za CEET bibibanze ku ikoranabuhanga rikoreshwa mu gukwirakwiza amashanyarazi, kwihutisha serivisi ndetse na gahunda yo gutanga serivisi hakoreshejwe ikoranabuhanga.

Banarebeye hamwe imbogamizi mu micungire y’ibikorwaremezo by’amashanyarazi ndetse baganira ku ngezo nziza zitanga umusaruro buri gihugu gifite mu micungire no kwagura imiyoboro y’amashanyarazi nk’ibihugu bifite ubukungu buri kwihuta.

Umuyobozi Mukuru wa EUCL ( Energy Utility Corporation Limited ),Gakwavu Claver, yashimangiye akamaro ko gusangira ubumenyi hagati y’ibigo bikwirakwiza   ingufu z’amashanyarazi byo muri Afurika kuko ibyo bihuriyeho ari byinshi.

Yagize ati: “Twishimiye kwakira bagenzi bacu bo muri CEET, turahamya ko ubufatanye hagati y’ibigo by’ingufu z’amashanyarazi  muri Afurika ari ingenzi mu kwihutisha iterambere ry’uru rwego. Mu gusangira ubunararibonye ku kwagura imiyoboro, ikoreshwa ry’ikoranahunga ‘smart metering’, no kunoza serivisi z’abakiriya, kugira ngo dushobore kongerera imbaraga zo gukwirakwiza amashanyarazi mu karere kuko ibyo duhuriyeho ari byinshi.”

Umuyobozi w’Itsinda rya CEET, Madamu Edwige Dorso Dede, akaba Umuyobozi ushinzwe Serivisi z’Ubucuruzi n’Itumanaho muri icyo kigo, yagaragaje ko bishimiye uko bakiriwe ndetse n’amahirwe yo gusangizwa ubumenyi ku mpinduka u Rwanda rugenda rugeraho mu rwego rw’ingufu z’amashanyarazi.

Yagize ati: “Intambwe u Rwanda rwateye mu kongera umubare w’abagerwaho n’amashanyarazi no kuvugurura imiyoboro yo kuyakwirakwiza zirashimishije cyane. Uru ruzinduko ni uburyo bwiza bwo gusangira ubunararibonye no gufatanya gushaka ibisubizo bifatika mu kunoza serivisi mu kigo cyacu.”

Izi ntumwa zanasuye bimwe mu bigo bitanga serivisi zijyanye n’amashanyarazi mu Rwanda birimo Pivot Access n’ishami rya REG ryo muri Nyarugenge, aho babonye uko uruhererekane rwo gukwirakwiza ry’amashanyarazi (electricity value chain) rukorwa ndetse n’uburyo bwo kwegera no kwakira abakiriya.

Mu gihe u Rwanda na Togo bikomeje kurebera hamwe imikoranire, uruzinduko rw’intumwa za CEET rugaragaza ubushake buhamye bwo guteza imbere ubufatanye mu karere, guhanga udushya no gufatanya kugera ku iterambere rirambye mu rwego rw’amashanyarazi.

                                                                   -------------