24
Jun

KIGALI, RWANDA – Ku wa 22 Kamena 2026 — Kuri uyu wa mbere,  Sosiyete y’u Rwanda ishinzwe ingufu REG yakiriye intumwa z'inzobere 17 mu mategeko, imiyoborere n’imicungire y’abakozi, ziturutse mu Muryango w’Ibihugu by’Iburasirazuba bwa Afurika bihurije hamwe Amashanyarazi (EAPP). Izi ntumwa zateraniye i Kigali mu nama y’akazi y’ibyumweru bibiri igamije gushimangira inzego n'amategeko agenga ubufatanye mu by’ingufu mu karere.
Hagendewe ku mabwiriza yatanzwe n’Inama y’Abaminisitiri ba EAPP ndetse n’Abagize Komite Nyobozi, iyi nama izibanda ku bikorwa byo guhuza Amasezerano y’Ibihugu (MoU) n’amategeko ngenga y’umuryango; gusuzuma no kuvugurura amategeko agenga imikorere y’amakomite anyuranye ya EAPP, ndetse no kuvugurura no kunoza amategeko agenga abakozi ba EAPP.
Umuyobozi mukuru wa REG, Byilingiro Maximilien, yahaye ikaze abitabiriye iyo nama ababwira ko ibihugu binyamuryango bya EAPP bizishimira umusaruro uzatangwa n'iyi nama, mu rwego rwo guteza imbere ihererekanya ry'amashanyari muri Afrika y'uburasirazuba. 
Gutsura Ubufatanye mu by’Ingufu mu Karere.
EAPP ni umuryango uhuza guverinoma z’ibihugu byo mu Burasirazuba bwa Afurika, ugamije guteza imbere imishinga yo kubaka ingomero z'amashanyarazi n'imiyoboro iyahuza. Nk’urubuga rw’ubufatanye mu rwego rw’amashanyarazi, East Africa Power Pool ifasha mu bucuruzi bw’amashanyarazi hagati y’ibihugu, ikarinda umutekano w’ingufu, ikabyaza umusaruro umutungo kamere, ikaba n'inkingi y’iterambere ry’ubukungu mu karere kose.
Uyu muryango uhuza ibigo by’amashanyarazi n’ingomero z’ingufu z’ibihugu 13 bitandukanye, ari byo: Burundi, DRC (Repubulika Iharanira Demokarasi ya Kongo), Djibouti, Misiri, Etiyopiya, Kenya, Libiya, Rwanda, Somaliya, Sudani y’Epfo, Sudani, Tanzania, na Uganda.

Sosiyete y’u Rwanda ishinzwe ingufu REG nk’umunyamuryango, igira uruhare rugaragara mu nzego z’imiyoborere n’amakomite y’inzobere za EAPP. 
Kwakira iyi nama y’amakomite bitanga amahirwe akomeye kuri REG yo kuzamura isura yayo mu karere no kugira uruhare rutaziguye mu iterambere rya EAPP. Byongeye kandi, ibi bishimangira umuhate w’u Rwanda mu miyoborere myiza, iterambere rirambye, n’impinduka zigezweho mu rwego rw’ingufu mu Burasirazuba bwa Afurika.