05
Oct

Mu irushanwa ry’umupira w’amaboko rya Volleyball ryaberaga mu karere ka Kirehe ryiswe 'Kirehe Open Volleyball Tournament 2026’,  ikipe ya Sosiyete y’u Rwanda ishinzwe ingufu REG VC yegukanye iryo rushanwa mu bagabo nyuma yo gutsinda  APR VC amaseti 3-2.

Ku Cyumweru tariki ya 4 Ukwakira 2026, nibwo habaye imikino ya nyuma mu byiciro byose (Abagabo, Abagore, Ingimbi, n'abakanyujijeho) ndetse no guhatanira umwanya wa gatatu mu bagabo. Ni irushanwa ryatangiye tariki ya 2 kugeza tariki 4 Ukwakira 2026 mu Karere ka Kirehe, Intara y'Iburasirazuba, rikaba ryarateguwe n’Akarere ka Kirehe ku bufatanye n'ishyirahamwe ry'umukino w'amaboko mu Rwanda (Rwanda Volleyball Federation FRVB). 

Mbere y'uko hakinwa imikino ya nyuma, habanje gukorwa siporo rusange yahuje abakinnyi bari bitabiriye iryo rushanwa ndetse n'abaturage b'Akarere ka Kirehe, hakaba haratangiwemo ubutumwa bwo gukumira kunywa inzoga zitujuje ubuziranenge n’ibindi biyobyabwenge byose.

Iyi mikino ya nyuma yari yitabiriwe n'Umunyabanga Uhoraho muri Minisiteri ya Siporo Ngabo Brave, Umuyobozi w'Intara y'Iburasirazuba Pudence Rubingisa, ndetse n'abandi bayobozi batandukanye.

Mu butumwa bwe, Umunyamabanga uhoraho muri Minisiteri ya Siporo, bwana Ngabo Brave, yatanze ubutumwa bwo kwiririnda ibiyobyabwenge n'inzoga z'ibyuma.

Yagize ati:  "Ntabwo wanywa icyuma cyangwa ibiyobyabwenge ngo ube umusiporutifu mwiza; turabasabye mwirinde kugira ngo mugire ubuzima bwiza."

Umuyobozi w'Akarere ka Kirehe ari nako kateguye iri rushanwa,  bwana Rangira Bruno, nawe yatanze ubutumwa bwo kwirinda inzoga zitujuje ubuziranenge no gukunda gukora siporo.

Yagize : "Nta terambere rishoboka mu gihe umuntu ari umusinzi; ndabasaba kandi gukomeza gukunda gukora siporo, no kunoza umurimo mu kwiteza imbere.‘’

• Umukino wa nyuma mu bagabo wahuje APR VC na REG VC maze REG VC itsinda amaseti 3-2 ( 26-28, 19-25, 26-24, 28-26 na 11-15).
• Umukino wa nyuma mu Bagore wahuje Police WVC yongeye gutsinda RRA WVC amaseti 3-0 (25-19,25-23,22-25)
• Mu guhatanira umwanya wa gatatu mu bagabo, Kirehe VC yatsinze Police VC amaseti 3-1 (21-25, 31-29, 25-20, 25-18).
• Mu ngimbi UPN/Gakoni VC yatsinze RUSUMO HS VC Amaseti 3-1.
• Mu bakanyujijeho RELAX VC yatsinzwe na KIREHE Legends VC amaseti 2-1.

Ubuyobozi Bukuru bwa REG bwashimiye abakinnyi bitwaye neza bakegukana igikombe mu irushanwa rya 'Kirehe Open Volleyball Tournament 2026’ ndetse bakaba bakomeje gutuma ikipe ya REG iba ikipe y'ubukombe mu gutwara ibikombe.

Mu bihembo byagenewe amakipe yitwaye neza muri iri rushanwa, mu bagabo REG VC yegukannye igikombe ndetse ihabwa na  sheki ya Miliyoni imwe y’amafaranga y’u Rwanda (1,000,000 Frw). APR VC yabaye iya kabiri yahembwe ibihumbi maganatanu (500,000 FRW),  naho Kirehe VC yegukanye umwanya wa gatatu yahembwe ibihumbi magana atatu (300,000 FRW). 

Tubibutse ko REG Volley Ball ariyo ifite igikombe cya shampiyona giheruka ndetse ikaba yaranabonye umwanya wa gatatu mu mikino nyafurika yabereye mu Rwanda muri Mata 2026.

                       -UMUSOZO-