13
Mar

Taliki ya 12 Werurwe, Ubuyobozi bwa Sosiyete y'u Rwanda Ishinzwe Ingufu REG, bwakiriye itsinda ry'abayobozi baturutse muri Uganda, mu kigo gishinzwe gukwirakwiza amashanyarazi cya UETCL (Uganda Electricity Transmission Company Limited).

Ni itsinda ryari riyobowe na Richard Matsiko, Umuyobozi Mukuru w'Icyo kigo. Ibiganiro byabo byibanze ku kunoza imikorere n'imikoraniranire mu gukwirakwiza no kohererezanya amashanyarazi yambukiranya imipaka y'ibihugu byombi ibizwi nka ‘Electricity Interconnection’.

Ibiganiro byabo kandi byanibanze  ku kureba uburyo bwo gukemura, mu buryo burambye kandi bwihuse imbogamizi zikigaragara mu guhanahana amashanyarazi mu bihugu byombi.

Ni ngingo impande zombi zigaragaza ko zikenewe kuko mu gihe tugezemo, abaturage bakenera gukoresha amashanyarazi umunsi ku wundi by'umwihariko abikorera biganjemo abanyenganda kandi akaba ari amashanyarazi adacikagurika.

Bemeranyije ko kudahungabana (disturbance) k'umuyoboro w'amashanyarazi uhuriweho n'u Rwanda na Uganda ari inshingano ya buri gihugu mu karere, ibi bikazanarushaho gutanga icyizere ku baturage mu mishinga yo guhanahana amashanyarazi mu bihugu bigize akarere k'Afurika y'iburasirazuba (Regional Electricity Interconnection).

Yaba umuyobozi wa REG Armand Zingiro ndetse n’umuyobozi wa UETCL Richard Matsiko, bagaragaje ubushake mu kunoza imikoranire y’ibigo byombi mu rwego rwo gukuraho imbohamizi zigihari mu gukwirakwiza amashanyarazi haba mu Rwanda no muri Uganda.

Muri urwo ruzinduko kandi izo ntumwa zanasuye ikusanyirizo (substation)r ya Shango iherereye mu murenge wa Nduba, mu karere ka Gasabo mu Mujyi wa Kigali basobanurirwa ikoranabuhanga u Rwanda rukomeje gushoramo imari mu rwego rwo kunoza ikwirakwizwa ry’amashanyarazi mu Rwanda ndetse no mu bihugu bituranyi.

Kugeza ubu u Rwanda ruri mu Umuryango uhuza ibigo by’amashanyarazi mu karere ka Afurika y’Iburasirazuba, uzwi nka Eastern Africa Power Pool (EAPP). EAPP ni urwego rw’Akarere rwashinzwe mu mwaka wa 2005 hagamijwe guhuza no guteza imbere ubucuruzi bw’amashanyarazi hagati y’ibihugu (cross-border power trade) ndetse no guhuza imiyoboro y’amashanyarazi (grid interconnection) mu bihugu bigize aka karere.

Kugeza ubu, EAPP igizwe n’ibihugu cumi na bitatu (13) byashyize umukono ku masezerano ya Leta ku zindi (Inter-Governmental Memorandum of Understanding - IGMOU), ndetse n’ibigo by’amashanyarazi cumi na bine (14) byashyize umukono ku masezerano hagati y’ibigo (Inter Utility Memorandum of Understanding - IUMOU).

U Rwanda kandi narwo ni umunyamuryango w’Umuryango uhuza ibigo by’amashanyarazi mu Karere ka Afurika yo Hagati, uzwi nka Central Africa Power Pool (PEAC/CAPP), akaba ari urwego rwihariye rwa ECCAS, rufite icyicaro i Brazzaville muri Congo.

Uyu muryango uteza imbere ihuzwa ry’imiyoboro y’amashanyarazi mu karere, umutekano w’ingufu (energy security), ndetse n’ubucuruzi bw’amashanyarazi hagati y’ibihugu biwugize. PEAC kandi ushyigikira iterambere ry’ingufu zisubira (renewable energy) no gukoresha neza ibikorwa remezo by’amashanyarazi bisanzwe bihari.